Ekkert hefur verið spilað í Úkraínu síðan í febrúar en þá sendi Vladímír Pútín, forseti Rússlands, her sinn inn í landið og hóf þar innrás.

Ástandið er slæmt í Úkraínu og hefur stríðið færst í suður og austurhluta landsins.

Pavelko, forseti úkraínska knattspyrnusambandsins, er nú vongóður um að hægt verði að spila fótbolta að nýju í ágúst, en hann átti gott samtal við Volodymir Zelenskyy, forseta Úkraínu.

„Við tókum ákvörðun með forsetanum að við myndum hefja leik í úkraínsku deildinni í ágúst. Við munum spila í öllum flokkum, semsagt úrvalsdeildinni, fyrstu, annarri og líka úrvalsdeild kvenna," sagði Pavelko.

Ræddu þeir saman um mikilvægi þess að spila fótbolta til að leiða hugann frá stríðinu en landslið Úkraínu leikur einmitt mikilvægan leik í dag er það mætir Wales í umspili um sæti á HM.