Hún er 42 ára gömul og hefur verið á mála hjá Paris Saint-Germain síðustu þrjú ár. Samningur hennar við félagið átti að renna út í sumar en hún er búin að framlengja um eitt ár.

PSG er með eitt af bestu kvennaliðum heims og var þremur stigum á eftir Lyon í frönsku titilbaráttunni þegar kórónaveiran skall á. Lyon er almennt talið vera besta félagslið Evrópu, og heims, í kvennaflokki og hefur Sara Björk Gunnarsdóttir verið orðuð við félagið.

Formiga er eini leikmaðurinn til að hafa tekið þátt í öllum sex Ólympíuleikum sem hafa verið haldnir síðan kvennaknattspyrna bættist við árið 1996. Þá hefur hún tekið sjö sinnum þátt í HM kvenna, sem er met.

Formiga á 198 landsleiki að baki fyrir Brasilíu.