Arnar Gunnlaugsson, þjálfari Víkinga.
Pablo Punyed.
Víkingar hafa náð að snúa gengi sínu við.
Næst á dagskrá er Flora Tallinn frá Eistlandi.
Arnar Gunnlaugsson, þjálfari Víkinga, ræddi við Fótbolta.net fyrir utan Víkingsvöll í dag. Á morgun spila Víkinga mikilvægan Evrópuleik gegn Flora Tallinn frá Eistlandi þar sem þeir munu reyna að stíga næsta skref í átt að riðlakeppni Sambandsdeildarinnar.
Arnar var fyrst spurður út í fréttir gærdagsins um að Pablo Punyed væri með slitið krossband. Pablo hefur verið Víkingsliðinu gífurlega mikilvægur en hann verður ekki meira með á þessu tímabili.
Arnar var fyrst spurður út í fréttir gærdagsins um að Pablo Punyed væri með slitið krossband. Pablo hefur verið Víkingsliðinu gífurlega mikilvægur en hann verður ekki meira með á þessu tímabili.
„Mér líður bara ömurlega með það. Maður var bara með brostið hjarta þegar maður fékk þessi tíðindi ef ég á að segja eins og er. Að öðrum ólöstuðum hefur Pablo verið mitt besta 'signing ever' í þessu félagi og hann er mikill leiðtogi. Hann er líka vinur minn. Ég veit hvað hann hlakkaði mikið til Evrópuleikjanna, landsliðsverkefna og þess háttar. Þetta er mikið áfall," segir Arnar.
„Við gerum okkar besta en maður þekkir þá tilfinningu vel að vera meiddur leikmaður. Þú ert einmana fyrstu dagana, sama hversu margir eru að senda þér skilaboð. Svo er það bara áfram gakk og að stíga upp. Það er ekkert annað í boði. Ég þekki Pablo og þrátt fyrir hækkandi aldur þá veit ég að hann vill ekki að ferillinn endi svona. Hann mun koma mjög sterkur til baka. Við munum styðja hann með ráðum og dáðum í öllu því ferli."
Þetta er stór stund fyrir félagið
Næst á dagskrá hjá Víkingum er Evrópuleikur gegn Flora Tallinn frá Eistlandi. Fyrri leikur liðanna fer fram á Víkingsvelli annað kvöld.
„Þessi tíðindi með Pablo sjokkera hópinn, eðlilega. Þetta eru miklir vinir og einn af þeirra bræðrum er að meiðast illa. Frá og með deginum í dag skynja ég að menn séu samt sem áður mjög einbeittir á þetta verkefni. Þetta er stór stund fyrir félagið. Við höfum áður verið í þessari stöðu og fengum þá Lech Poznan. Það voru flottir leikir. Núna er það Flora Tallinn sem er sigursælasta félag Eistlands. Við berum virðingu fyrir verkefninu og mætum auðmjúkir til leiks, en við ætlum okkur áfram," segir Arnar.
Hann telur möguleikana góða í þessu verkefni.
„Þeir eru mjög góðir. Við þurfum að eiga toppleiki en ég held að okkar toppleikur muni fara langa leið með að fara áfram. En hafandi sagt það er þér refsað meira í Evrópuleikjum. Við þurfum að vera með öll skynfærin á hreinu til að eiga möguleika. Við erum búnir að skoða þá mjög vel. Þeir eru kannski ekki ósvipaðir okkur; þeir eru með góða blöndu af reynsluboltum sem hafa spilað fleiri tugi landsleikja og svo eru efnilegir strákar. Þeim hefur ekki gengið vel í deildinni núna en við þekkjum það af eigin raun að það þarf lítið til að snúa genginu við."
Það sem gerir íþróttina svona skemmtilega
Fyrir stuttu síðan var grátt ský yfir Víkingi ef svo má segja. Það gekk ekki vel og liðið var ekki langt frá því að falla úr Evrópu. Núna er útlitið talsvert betra og Víkingsliðið er í mjög raunhæfum möguleika á að fara í riðlakeppni, á toppnum í deildinni og á leið í bikarúrslitaleik enn eitt árið.
„Ég get alveg sagt þér nákvæmlega hvenær þetta gerðist: Á 30. mínútu á móti HK. Það var dauði og djöfull fram að því og allir að vorkenna sjálfum sér. Við héldum áfram að halda í strúkturinn og reyna að berjast fyrir augnablikinu til að snúa genginu við. Þá skorum við þetta mark á móti HK... menn héldu í það sem hefur gert okkur að góðu liði. Við kaupum okkur heppni með dugnaði og síðan þá hefur lífið verið yndislegt. Þetta er það sem gerir íþróttina svo skemmtilega. Það er stutt í bölmóðinn og vælið, en líka stutt í velgengnina. Þú verður að hafa trú á henni," segir Arnar.
Allt viðtalið má sjá í spilaranum hér að ofan.
