4. deild: Tvær tvennur er Árborg vann Hafnir

David Adam Dabrowski og Jökull Hermansson skoruðu báðir tvennu í 5-2 sigri Árborgar á Höfnum í 4. deild karla í gær.

Hafnir byrjuðu af krafti og komust í 2-0 á fyrstu fimm mínútunum. Útlitið var því ekki gott fyrir gestina sem náðu þó að svara fyrir sig áður en fyrri hálfleikur var hálfnaður.

David minnkaði muninn á 16. mínútu og Andrés Karl Guðjónsson jafnaði metin tíu mínútum síðar.

Árborg gerði síðan út um leikinn á tuttugu mínútna kafla í síðari hálfleik. David skoraði sitt annað mark og Jökull bætti við tveimur mörkum á sjö mínútum.

Árborg hefur unnið fjóra af síðustu fimm leikjum sínum og situr í þriðja sæti með 29 stig, fjórum stigum frá toppnum.

Hafnir eru á botninum með sjö stig og hafa tapað síðustu þremur leikjum.