Stuðningsmenn KA láta mikla óánægju í ljós

Fótbolti.net ræddi við mann fyrir norðan í dag sem segir að mikil ólga sé meðal stuðningsmanna KA en nokkrir af þeim hafa ekki farið leynt með óánægju sína. Þar á meðal er Ólafur Pálsson en færsla sem hann skrifaði á Facebook hefur vakið mikla athygli.

Þar segir hann frá því að færslur hafi verið fjarlægðar á stuðningsmannasíðu KA þar sem hann gagnrýndi liðið

„Þetta er bara einhver norður-kóresk stjórnun," segir Valur í Innkastinu en umrædda færslu má sjá í heild hér að neðan.

---

Ólafur Pálsson á Facebook:
Ég er veikur. Veikur KA-maður eins og þið vitið sem mig þekkið. Karlalið KA í fótbolta er á vondum stað en ég óttast að vandamál KA sé ekki eingöngu bundið við leikmannahópinn, liðið og umgjörðina í kringum það.

Ég skrifaði nokkrar línur á stuðningsmannasíðu KA áðan. Spurði hvort liðið væri að æfa saman á milli leikja því það er ekki að sjá á spilamennskunni. Ég sagði að okkur hafi tekist að búa til líklega verst spilandi liðið í deildinni úr prýðilegum leikmönnum. Ég sagði að liðið væri á leiðinni í Lengjudeildina að ári og sagði að nú væri kominn tími til að vakna.

Færslan mín var tekin út. Færsla á stuðningsmannasíðu sem lýsti skoðun minni á hlutunum var tekin út.

Þá spurði ég í annarri færslu hvort það væri í alvörunni ritskoðun á téðri síðu. Hvort fólk fengi í alvöru ekki að tjá skoðanir sínar á KA-liðinu á stuðningsmannasíðu KA stofnaðri af stuðningsmanni KA úti í bæ.

Færslan var einnig tekin út.

Finnst stjórnendum síðunnar þetta í lagi? A.m.k. einn ykkar ber ábyrgð á þessu rugli.

Ef það má ekki gagnrýna verður aldrei framþróun. Það þarf ekkert að vernda þessa stráka, þeir fá borgað fyrir að spila leikinn og eru ekki yfir gagnrýni hafnir, ekki frekar en þjálfarinn, stjórnin, stuðningsmennirnir eða þið.