16-liða úrslit HM eru að baki en fjallað er ítarlega um mótið í HM hringborðinu, hlaðvarpsþáttum hér á Fótbolta.net. Eftir hvern leik útsláttarkeppninnar er valinn maður leiksins í boði Netgíró en hér fyrir neðan má sjá hverjir voru valdir bestir í leikjum 16-liða úrslitanna.
Denzel Dumfries, Holland - Vængbakvörður Inter fór á kostum í 3-1 sigri gegn Bandaríkjunum. Tvær stoðsendingar og eitt mark. Leikkerfi Louis van Gaal svínvirkaði.
Lionel Messi, Argentínu - Leiddi þjóð sína til sigurs gegn Ástralíu. Skoraði fyrra mark Argentínu á frábæran hátt.
Kylian Mbappe, Frakkland - Fór algjörlega á kostum og var óstöðvandi í 3-1 sigri gegn Póllandi. Stoðsending og tvö glæsileg mörk.
Jude Bellingham, England - Verðmiðinn hækkar og hækkar. Bellingham var sífellt að búa til vandræði fyrir Senegal en enska landsliðið vann á endanum 3-0 sigur.
Dominik Livakovic, Króatía - Markvörður Dinamo Zagreb varði þrjár vítaspyrnur í vítakeppninni gegn Japan.
Vinicius Junior, Brasilía - Brassarnir buðu upp á sóknarveislu gegn Suður-Kóreu og Vini Jr. var geggjaður. Skoraði fyrsta markið og átti einnig stoðsendingu.
Sofyan Amrabat, Marokkó - Kóngur í ríki sínu á miðsvæðinu þegar Marokkó hélt Spáni algjörlega í skefjum. Marokkó vann í vítakeppni og Amrabat, sem spilar fyrir Fiorentina, er sterklega orðaður við ensk úrvalsdeildarfélög.
Athugasemdir