Vill halda Palhinha áfram hjá Tottenham

Palhinha er á láni hjá Tottenham frá Bayern München, en átti stórleik þegar liðið vann mikilvægan sigur á Aston Villa um síðustu helgi.

Portúgalinn hefur spilað 42 leiki á tímabilinu og komið að níu mörkum. Aðeins þrír útileikmenn hafa spilað fleiri mínútur en hann með Tottenham á leiktíðinni og mikilvægi hans því gríðarlegt.

De Zerbi vill halda honum áfram hjá Tottenham á næstu leiktíð, en hann segir mikilvægt að hafa karakter eins og Palhinha í hópnum.

„100 prósent. Við verðum að byrja á svona týpum af fólki. Við þurfum fyrst og fremst traustar manneskjur og fótboltamenn sem við getum treyst á.

„Palhinha er einn af þeim bestu. Sem leikmaður er það klárt mál, en líka sem maður. Ég vil sjá leikmennina með sömu ástríðu, anda, persónuleika og við erum bara ótrúlega heppnir að hafa hann með okkur,“ sagði De Zerbi.