Sterkust í 9. umferð - Kominn tími á að stela fyrirsögnum

„Með þrennu í dag! Ekki hægt að velja neinn annan leikmann, var alltaf hárrétt kona á hárréttum stað og vissi nákvæmlega hvert boltinn var að fara. Dugleg inn á miðsvæðinu og eðalslútt hjá henni í kvöld," skrifaði Snæbjört Pálsdóttir í skýrslu sinni frá leiknum.

Óskar Smári Haraldsson, þjálfari Stjörnunnar, hrósaði Birnu í hástert eftir leikinn.

„Birna vel að þessum verðlaunum komin. Hún sjálf var fljót að þakka liðsfélögunum undirbúninginn og það segir margt um hana og stemninguna innan liðsins. Birna er klók og öflug inn í teignum og rak endahnútinn á þremur góðum sóknum okkar," segir Óskar við Fótbolta.net.

Hann ræddi einnig við Vísi eftir leik. „Ég held að það séu engar tilviljanir í fótbolta og Birna eiginlega trekkti okkur í gang í dag. Hún setti svolítið tóninn eftir 10–15 mínútur, fór að pressa fastar og var mjög, mjög vel að þessum þremur mörkum komin."

„Birna er bara ofboðslega klókur leikmaður. Það fer ekki alltaf mest fyrir henni, hún er ekki að taka tvöföld skæri og fara fram hjá tveimur leikmönnum. En vá hvað hún er mikilvæg í okkar leik."

„Hún er ofboðslega klók, hún er ósérhlífin. Hún er ekki fljótust í löppunum en hún er einn hraðasti leikmaðurinn í hausnum. Birna lætur lítið fyrir sér fara og kannski er kominn tími á að stela svona fyrirsögnum, því hún á það skilið," sagði Óskar Smári en Birna fær svo sannarlega fyrirsagnirnar að þessu sinni.