Æfingaleikur: Breiðablik skellti HK á Kópavogsvelli

Breiðablik tók á móti HK í nágrannaslag í dag, um æfingaleik á Kópavogsvelli var að ræða.

Breiðablik vann stórsigur og voru Blikar í raun búnir að tryggja sér sigurinn í hálfleik þegar staðan var orðin 4-0. Kristófer Ingi Kristinsson, sem sterklega hefur verið orðaður við Val, skoraði tvö mörk, landsliðsmaðurinn Ágúst Orri Þorsteinsson skoraði eitt og reynsluboltinn Andri Yeoman sömuleiðis.

Byrjunarlið Breiðabliks:
Anton Ari; Óli Valur, Viktor Örn, Ívar, Aron Bjarnason; Andri, Höskuldur, Gabríel Snær; Ágúst Orri, Kristófer, Jónatan Dagur.

HK var ekki með sitt allra sterkasta lið, en þó nokkuð sterkt og því koma lokatölur á óvart. HK lék vel framan af seinni hálfleik, fékk vítaspyrnu í stöðunni 4-0 en sú spyrna fór forgörðum.

Á lokakafla seinni hálfleiks voru það svo yngri leikmennirnir sem bættu við mörkum fyrir Blikana. Gunnleifur Orri Gunnleifsson (2008), sonur markmannsins Gunnleifs Vignis Gunnleifssonar, skoraði úr vítaspyrnu, Birkir Þorsteinsson (2009) skoraði eitt og Maríus Warén (2008), yngri bróðir Benedikts Warén, skoraði einnig.

Breiðablik er að undirbúa sig fyrir Bestu deildina sem hefst eftir mánuð. Liðið mætir Íslandsmeisturum Víkings eftir akkúrat mánuð. HK er í Lengjudeildinni og spilar sinn fyrsta leik í deildinni í lok apríl.