Flottur síðari hálfleikur gerði gæfumuninn
Sigurbjörn var sáttur með sigurinn í kvöld
Sigurbjörn Hreiðarsson þjálfari Grindavíkur var sáttur eftir 3-2 sigur á Þrótti í kvöld. Eftir að jafnt var í hálfleik tóku Grindvíkingar öll völd á vellinum í síðari hálfleik og unnu sanngjarnan sigur.
Lestu um leikinn: Þróttur R. 2 - 3 Grindavík
„Geggjað, vinna öfluga Þróttara. Þeir eru með mjög beinskeytta stráka. Ég er gríðarlega ánægður með að koma hingað og ná í þrjú stig og skora þrjú mörk og hefðum átt að skora fleiri." voru fyrstu viðbrögð Sigurbjörns eftir leik.
Þróttarar voru beittari síðustu mínútur fyrri hálfleiks en sáu ekki til sólar í síðari hálfleik.
„Við ákváðum að stíga aftur á bensíngjöfina, við duttum niður hérna. Þeir voru bara betri en við í lok fyrri hálfleiks og skora fínt mark. Við fórum yfir það að mæta aftur til leiks og við gerðum það."
Oddur Ingi Bjarnason var góður í liði gestanna í kvöld og fóru Grindvíkingar mikið upp hans megin, Sigurbjörn var spurður að því hvort það hefði verið planið.
„Já meðal annars, við erum með ákveðnar leiðir og þetta er ein af þeim."
Næsti leikur Grindvíkinga er gegn Gróttu
„Það leggst mjög vel í mig, Gróttumennirnir eru mjög öflugir. Voru í efstu deild í fyrra og Gústi með þá og þekkir þetta. Þeir eru með eitt af bestu liðunum í þessari deild."
Nánar er rætt við Sigurbjörn í spilaranum hér að ofan.
