Besti dómarinn 2026 - Tveir hástökkvarar banka fast á dyrnar

Í Innkastinu var opinberað val á þeim bestu í Bestu deild karla 2026. Ívar Orri Kristjánsson er dómari ársins en þetta er í þriðja sinn sem hann hlýtur þennan titil hjá Fótbolta.net.

Að mati dómnefndar er Ívar Orri besti dómari deildarinnar í dag, með góða leikstjórn, mikið öryggi og nær vel til leikmanna. Hann er líka sá íslenski dómari sem er hæst skrifaður á lista UEFA.

En tveir aðrir dómarar fá einnig hrós í Innkastinu. Þórður Þorsteinsson Þórðarson, oftast kallaður ÞÞÞ, hefur tekið öruggum framförum og er kominn í hóp bestu dómara landsins. Hann veitti Ívari samkeppni um titilinn dómari ársins.

Þá átti Gunnar Oddur Hafliðason mjög gott sumar og má kalla hann hástökkvara ársins enda tekið miklum framförum.