Ólafur Ingi Skúlason.
Fyrir leik hérna á Möltu.
Strákarnir í U19 landsliðinu luku keppni á Evrópumótinu í kvöld.
„Það eru blendnar tilfinningar, þannig. Ég er ótrúlega stoltur af strákunum og þeirra framlagi. Við sönnuðum það að við eigum heima á svona móti," sagði Ólafur Ingi Skúlason, þjálfari U19 landsliðsins, í samtali við Fótbolta.net í kvöld.
„Við erum nálægt því (að fara áfram). Noregsleikurinn var mjög jafn og ég er sannfærður um það að Norðmenn séu ekkert sterkari en við. Leikjauppröðunin spilaðist svolítið fyrir þá, en það þýðir ekkert að kvarta yfir því."
„Við erum nálægt því (að fara áfram). Noregsleikurinn var mjög jafn og ég er sannfærður um það að Norðmenn séu ekkert sterkari en við. Leikjauppröðunin spilaðist svolítið fyrir þá, en það þýðir ekkert að kvarta yfir því."
Lestu um leikinn: Ísland U19 0 - 0 Grikkland U19
Strákarnir gerðu markalaust jafntefli við Grikkland í lokaleik sínum á Evrópumótinu og rétt misstu af sæti í undanúrslitunum, rétt misstu af því að vera á meðal fjögurra bestu liða Evrópu í þessum aldursflokki.
„Við hefðum getað gert aðeins betur í dag, sérstaklega inn á síðasta þriðjung. Því miður náðum við ekki að knýja fram sigur, það hefði verið gaman að fara héðan með sigur. Fyrst og fremst er ég stoltur af strákunum, þetta er frábær reynsla fyrir þá. Takk fyrir mig," sagði Ólafur Ingi.
Mikill og þéttur múr
Það hefði ekki skipt máli fyrir íslenska liðið að taka sigur í þessum leik upp á niðurstöðuna í riðlinum að gera því Spánn og Noregur gerðu markalaust jafntefli í hinum leiknum, í leik þar sem bæði lið voru sátt með eitt stig.
Grikkir áttu ekki möguleika á því að fara áfram og voru ekki að spila upp á neitt nema stoltið, en þeir ákváðu að pakka í vörn og gerðu ekki neitt sóknarlega.
„Þetta er nákvæmlega það gríska lið sem ég átti von á í mótinu. Þeir fengu bara eitt mark á sig í milliriðlinum og svo lenda þeir í því að fá tíu mörk á sig í tveimur leikjum hérna, sem er mjög ólíkt því. Ég átti von á því að þeir myndu leggjast til baka, en kannski ekki alveg með þessu móti; þetta var mikill og þéttur múr. En við getum ekki kvartað yfir því, þetta var bara þeirra leikplan. Við hefðum mátt vera þolinmóðari og við vorum að flækja þetta. Við komum í ágætar fyrirgjafastöður þar sem vantar upp á þetta síðasta hjá okkur. Strákarnir læra af þessu, þetta hefur verið frábær skóli fyrir þá."
Hrós á félögin í landinu
Eins og Óli nefnir, þá vantaði aðeins þetta síðasta. Orri Steinn Óskarsson, sem var markahæstur allra í undankeppninin, var ekki með í þessu móti vegna meiðsla. Hugsaði þjálfarinn einhvern tímann um Orra Stein í þessum augnablikum?
„Nei, þetta var vitað fyrir mót. Við erum með leikmenn sem eiga að klára þetta. Við komumst í fínar stöður. Það vantaði bara herslumuninn og ég held að það sé ekkert bundið við einstaklinga," sagði Ólafur.
Framtíðin er björt í íslenskum fótbolta. „Ekki spurning. Það er hrós á félögin í landinu, þau eru að gera frábæra hluti. Þjálfarar yngri landsliða vilja að það haldi áfram, að þessir strákar fái tækifæri með meistaraflokkum og fái að spila á háu stigi. Við getum verið stolt af þessu og eigum að vera það. Núna heldur vinnan áfram. Við erum búin að fá smjörþefinn af þessu og við viljum meira," sagði þjálfarinn að lokum en viðtalið má sjá í heild sinni hér að ofan.
