Besta deildin: HK vann níu KR-inga í ótrúlegum leik

Það var veisla á Meistaravöllum þar sem HK var í heimsókn en leikurinn bauð upp á allskonar skemmtun.

Sigurpáll Sören Ingólfsson stóð í marki KR þar sem Guy Smit var í banni. Sigurpáll kom við sögu undir lok fyrri hálfleiks þegar hann rauk út úr markinu þegar Finnur Tómas ætlaði að skalla boltann til baka en boltinn sveif yfir maarkvörðinn.

Atli Þór Jónasson var fljótur að átta sig og var á undan í boltann og skoraði í autt markið en þurfti að fara af velli vegna meiðsla í kjölfarið.

Arnþór Ari tvöfaldaði forystu HK þegar hann var fyrstur á boltann inn á teignum eftir sendingu frá Alta Hrafni.

Stuttu síðar bættist grátt ofan á svart hjá KRingum þegar Kristján Flóki Finnbogason fékk að líta rauða spjaldið fyrir glórulaust brot. Einum færri tókst KR að minnka muninn þegar Atli Sigurjónsson skoraði beint úr hornspyrnu.

KR kláraði leikinn tveimur mönnum færri sem Moutaz Neffati fékk að líta sitt annað gula spjald.

Hákon Ingi Jónsson var nálægt því að innsigla sigurinn í uppbótatíma en skaut framhjá úr dauðafæri en það kom ekki að sök.