„Ekki eins og þetta séu Ferdinand og Vidic sem hann þarf að slá út"

„Eftir tæplega 80 mínútur koma Ari Leifsson inn á og Árni Vill, 0-3 undir á móti KA," bendir Kári Snorrason á.

„Maður var eiginlega búinn að gleyma því að Árni Villa væri þarna. Ari Leifs er ekki að ná að slá menn úr byrjunarliðinu. Hvað ætlum við að tala lengi um að hann sé að komast í eitthvað form? Hann kom fyrir ansi mörgum vikum," segir Valur Gunnarsson og bætir eftirfarandi við um Stjörnuna:

„Þegar maður horfir á þennan hóp hjá Stjörnunni þá er gjörsamlega glórulaust að við séum að tala um þá í þessum neðri hluta núna. Þetta er þvílíkt vonbrigða tímabil hjá Stjörnunni og það vita það allir. Það verður mjög fróðlegt að sjá hvað gerist í framhaldinu varðandi þjálfararáðningu og annað," bætir Valur við en þeir Heimir Guðjónsson og Rúnar Páll Sigmundsson eru hvað mest orðaðir við þjálfarastöðuna hjá Stjörnunni.

Ekki eins og þetta séu Ferdinand og Vidic
Fyrirliðinn Guðmundur Kristjánsson ákvað vegna persónulegra ástæðna að spila ekki með Stjörnunni í lokaleikjunum en hann æfir hins vegar með liðinu.

,Þess vegna finnst mér þetta svo skrítið með Ara, það er ekki eins og þetta séu Ferdinand og Vidic sem hann þarf að slá út," segir Kári.

Rio Ferdinand og Nemanja Vidic mynduðu hjá Manchester United eitt allra besta miðvarðapar í sögu ensku úrvalsdeildarinnar.

Ari (1998) sneri heim til Íslands í sumar eftir að hafa farið út í atvinnumennsku árið 2020. Hann lék erlendis með Strömsgodset í Noregi og Kolding í Danmörku.