Erling Braut Haaland hafði hljótt um sig er Manchester City lagði Bournemouth að velli í þægilegum sigri í dag.
Haaland var í byrjunarliðinu og gaf stoðsendingu í leiknum en það hefur vakið athygli að hann átti tvær heppnaðar sendingar í öllum leiknum. Stoðsendingin var því ein af aðeins tveimur heppnuðum sendingum gegn nýliðum Bournemouth.
Norðmaðurinn öflugi spilaði ekki illa í leiknum heldur fékk hann boltann sárasjaldan. Bournemouth varðist mjög aftarlega og var alltaf með nokkra menn á Haaland sem fann aldrei pláss. Hann dró varnarmennina í sig og skapaði þannig pláss fyrir samherjana sína í 4-0 sigri.
Haaland hefði getað skorað minnst tvö mörk í leiknum en fékk ekki boltann þrátt fyrir að koma sér stundum í frábærar staðsetningar. Það var nokkrum sinnum sem liðsfélagar hans létu frekar vaða sjálfir heldur en að senda boltann þar sem það stafaði hvort sem er alls engin ógn af Bournemouth í leiknum.
Það hefur enginn leikmaður í byrjunarliði Pep Guardiola hjá Man City átt svona fáar sendingar í leik áður. Þetta er því nýtt met hjá metabrjótinum Haaland.