Íslenska liðið mætt til Istanbúl - Engin vandræði á flugvellinum

Íslenska liðið flaug til Istanbúl með leiguflugi og gekk ferðalagið mjög vel.

Þegar íslenskir landsliðsmenn komu til Antalya um helgina þurftu sumir þeirra að bíða lengi til að komast í gegnum vegabréfaeftirlit.

Tyrkir voru ósáttir fyrir fyrri leikinn í júní og vildu meina að alltof langan tíma hefði tekið að koma liðinu í gegnum Leifsstöð.

Í Istanbul gekk allt hins vegar hratt fyrir sig hjá íslenska liðinu. Gríðarleg öryggisgæsla var á flugvellinum og lögreglumenn mynduðu göng á flugvellinum. Hópur tyrkneskra fjölmiðlamanna beið einnig eftir íslenska liðinu á flugvellinum.

Íslenska liðið fer á æfingu á keppnisvellinum klukkan 18:00 að staðartíma eða 15:00 að íslenskum.