Real Madrid er dottið úr leik í spænska Ofurbikarnum eftir tap í undanúrslitaleik gegn Athletic Bilbao.

Fyrri hálfleikurinn var kaflaskiptur þar sem Athletic nýtti sína kafla vel á meðan Real mistókst að skora. Raul Garcia skoraði á átjándu mínútu og svo aftur úr vítaspyrnu tuttugu mínútum síðar.

Real tók öll völd á vellinum eftir leikhlé en átti í miklum erfiðleikum með að koma knettinum í netið. Karim Benzema minnkaði muninn á 73. mínútu en nær komust lærisveinar Zinedine Zidane ekki.

Athletic mætir Barcelona í úrslitaleik eftir að Barca sigraði Real Sociedad í vítaspyrnukeppni í gærkvöldi.