Spennandi leikmenn til að fylgjast með í umspilinu í Lengjudeildinni

Aron Snær Ingason - Þróttur R.
Það hefur farið mikið fyrir Aroni á tímabilinu og er hann markahæsti leikmaður Þróttar. Aron, sem er fæddur árið 2001, er stæðilegur kantmaður sem hefur skorað ellefu mörk í sumar.

Samningur hans við Þrótt rennur út eftir tímabil og er hann sterklega orðaður við Val. Hlíðarendafélagið reyndi við Aron í sumarglugganum en Þróttur hafnaði tilboði Vals.

Fleiri leikmenn úr Þrótti til að fylgjast með; Örn Bragi Hinriksson (2007), Hlynur Þórhallsson (2005), Brynjar Gautur Harðarson (2004)

Guðmundur Tyrfingsson - Fylkir
Annar leikmaður sem verður samningslaus í vetur og mörg augu eru á. Guðmundur er oft kallaður rútubílstjórinn og hefur hann farið mikinn í sumar, skorað alls 13 mörk í Lengjudeildinni.

Hann verður samningslaus eftir tímabil og var hann, ásamt Aroni Snæ, á lista Fótbolta.net yfir samningslausa leikmenn sem verða eftirsóttir í vetur.

Guðmundur hefur áður spilað í Bestu deildinni með Fylki og ÍA en hefur þó ekki náð að sýna sitt besta í þeirri deild.

Fleiri leikmenn úr Fylki til að fylgjast með; Theódór Ingi Óskarsson (2006) , Tumi Fannar Gunnarsson (2005), Bjarki Steinsen Arnarsson (2005)

Karl Ágúst Karlsson - HK
Karl Ágúst er kantmaður sem er fæddur árið 2007. Hann hefur verið lykilmaður í liði HK á tímabilinu og skorað sex mörk.

Þrátt fyrir ungan aldur er Karl að nálgast 100 meistaraflokksleiki. Hann byrjaði að spila fyrir meistaraflokk HK árið 2022, þá aðeins fimmtán ára gamall.

Hann hefur verið orðaður við félög í Bestu deildinni og eru Skagamenn með augastað á þessum nítján ára leikmanni.

Fleiri leikmenn úr HK til að fylgjast með; Þorvaldur Smári Jónsson (2008), Ólafur Örn Ásgeirsson (m) (2003), Tumi Þorvarsson (2005), Atli Þór Gunnarsson (2006)

Viktor Nói Vidarsson - Njarðvík
Viktor er nítján ára gamall miðjumaður sem var lánaður til Njarðvíkur frá FH í sumarglugganum. Hann kom við sögu í tíu leikjum í Bestu deildinni með Fimleikafélaginu á tímabilinu og hefur komið sterkur inn í lið Njarðvíkinga.

Hann skoraði í lokaumferðinni gegn Lengjudeildarmeisturum Aftureldingar.

Viktor er sonur Arnars Þórs Viðarssonar, fyrrverandi landsliðsþjálfara, og á hann að baki átta leiki fyrir íslenska U19 landsliðið en þar áður hafði hann leikið með unglingalandsliðum Belgíu.

Fleiri leikmenn úr Njarðvík til að fylgjast með; Stefán Gísli Stefánsson (2006) , Freysteinn Ingi Guðnason (2007), Hrafn Guðmundsson (2006)

miðvikudagur 9. september
Lengjudeild karla - Umspil
17:00 Njarðvík-Þróttur R. (JBÓ völlurinn)
19:15 HK-Fylkir (Kórinn)

sunnudagur 13. september
Lengjudeild karla - Umspil
14:00 Fylkir-HK (tekk VÖLLURINN)
16:15 Þróttur R.-Njarðvík (PEPSI völlurinn)