Byrjunarlið KR og Vals: Óskar Hrafn setur 15 ára strák í byrjunarliðið

Það hefur ekki farið framhjá nokkrum manni að Aron Sigurðarson, fyrirliði KR, er í leikbanni í kvöld en hann var dæmdur í tveggja leikja bann á síðasta fundi aganefndar eftir rautt spjald í 2-2 jafntefli gegn KA í fyrstu umferð. KR er með tvo menn í banni þar sem Hjalti Sigurðsson fékk tvö gul og þar með rautt í þeim leik.

Vicente Valor sest á bekkinn og því alls þrjár breytingar á byrjunarliðinu. Ástbjörn Þórðarson og Aron Þórður Albertsson koma inn í byrjunarliðið og einnig hinn fimmtán ára gamli Sigurður Breki Kárason (f. 10. des 2009) sem er að spila sinn fyrsta leik í Bestu deildinni. Hann er mikið efni og á þrjá leiki að baki fyrir U15 ára landslið Íslands.

Hjá Val er Ögmundur Kristinsson enn á bekknum og Stefán Þór Ágústsson því í rammanum. Kristinn Freyr Sigurðsson er ekki í leikmannahópnum og Tómas Bent Magnússon sest á bekkinn. Bjarni Mark Antonsson og Orri Hrafn Kjartansson koma inn í byrjunarliðið. Þá vekur athygli að Aron Jóhannsson er ekki í hópnum.