WBA missteig sig í baráttunni um titilinn í ensku B-deildinni í kvöld er liðið gerði markalaust jafntefli við Fulham á The Hawthorns-leikvanginum.

WBA hefur verið í harðri baráttu við Leeds um toppsætið á þessari leiktíð en nú er Leeds komið í væna stöðu.

Heimamönnum tókst ekki að skora og átti liðið tólf skot, þó aðeins tvö þeirra á markið.

Þessi úrslit þýða það að WBA er í öðru sæti með 82 stig eftir 44 leiki, tveimur stigum á eftir Leeds sem mætir Barnsley á fimmtudag og getur liðið mögulega tryggt úrvalsdeildarsæti ef Brentford tapar stigum á morgun. Fulham á enn möguleika á að ná öðru sæti en liðið er með 77 stig í 4. sæti og er öruggt með umspilssæti.