Ætla ekki að semja við Dennis eftir læknisskoðun

Dennis er 27 ára gamall og reyndist einn besti leikmaður Watford í úrvalsdeildinni þegar hann kom fyrst í enska boltann.

Hann skoraði 10 mörk í 33 deildarleikjum tímabilið 2020-21 þegar Watford féll niður í Championship deildina. Nottingham Forest keypti Dennis fyrir um 10 milljónir punda eftir fallið en hann fann aldrei taktinn með liðinu.

Hann skoraði 2 mörk í 25 leikjum á sínu fyrsta tímabili hjá Forest og var lánaður út til Istanbul Basaksehir, Watford og Blackburn Rovers en náði sér aldrei á strik. Meiðsli settu strik í reikninginn og hefur hann átt erfitt með að halda sér í formi.

Dennis hefur verið að æfa með Watford undanfarnar vikur og staðið sig vel á æfingum. Félagið vildi semja við hann á frjálsri sölu en hætti við eftir að leikmaðurinn fór í læknisskoðun í gær. Hann var búinn að gefa munnlegt samþykki fyrir eins og hálfs árs samningi með möguleika á auka ári.

Sky Sports greinir frá þessu og segir að Watford sé ekki búið að útiloka að fara aftur í viðræður við Dennis eftir áramót.

Líklegt er að Dennis haldi áfram að æfa með Watford, sem er komið með 12 stig eftir 9 fyrstu umferðirnar í Championship deildinni.