Byrjunarlið Fylkis og Vals: Gary Martin ekki í hóp

Núna klukkan 19:15 hefst leikur Fylkis og Vals á Würth vellinum í fjórðu umferð Pepsi Max-deildar karla. Heimamenn í Fylki hafa farið ágætlega af stað og eru með fimm stig eftir þrjár umferðir á meðan að Íslandsmeistarar Vals hafa farið mjög illa af stað og eru einungis með eitt stig.

Eins og hefur ekki farið framhjá neinum hafa Valsarar verið mikið í umræðunni og ekki síst vegna Gary Martin en Ólafur Jóhannesson, þjálfari Vals, vill losna við Englendinginn og æfði hann til að mynda ekki með liðinu í gær. Byrjunarliðin eru nú klár.

Heimamenn gera tvær breytingar á sínu liði frá síðasta leik. Kolbeinn Birgir Finnsson og Andrés Már Jóhannesson setjast á bekkinn og inn í þeirra stað koma þeir Orri Sveinn Stefánsson og Arnór Gauti Ragnarsson.

Valsmenn gera þrjár breytingar á sínu liði. Sebastian Hedlund, Emil Lyng og títtnefndur Gary Martin koma út og inn koma Orri Sigurður Ómarsson, Sigurður Egill Lárusson og Kristinn Ingi Halldórsson.