Stórleikur Víkings og Breiðabliks, toppliðanna tveggja frá því á síðasta tímabili, fer fram í kvöld. Breiðablik er í 2. sæti fyrir leikinn með fullt hús stiga. Víkingur er í fimmta sæti, fimm stigum á eftir Blikum og hefur leikið leik meira.
Leikurinn hefst klukkan 19:15 og er ekki seinna vænna en að spá í spilin hvað byrjunarliðin varða. Viktor Karl Einarsson er að koma til baka eftir meiðsli og Fótbolti.net spáir því að hann byrji í dag þó að Dagur Dan Þórhallsson hafi leyst hann af með því að skora tvö mörk í tveimur leikjum.
Hjá Víkingum gekk vel að að sækja upp vinstra megin þegar liðin mættust í Meistarakeppni KSÍ fyrir mót. Helgi Guðjónsson átti góðan leik þá og sú frammistaða spilar inn í þegar honum er spáð byrjunarliðssæti í kvöld. Þá lék Pablo Punyed hálftíma í síðasta leik sem voru hans fyrstu mínútur í sumar. Honum er ekki spáð sæti í byrjunarliðinu.
Athugasemdir