„Það verði meiri flótti þaðan en úr Val"

„Ég átta mig eiginlega engan veginn á því hvað gerist," sagði Hörður Bjarnar Hallmarsson, þjálfari Hauka, um stöðuna hjá Val ef liðið fellur. „Ég held að það sé partur af þessum hópi sem eru miklir Valsarar og vilja vera byrjunarliðsleikmenn í Val. En ég átta mig ekki á því hvernig það yrði."

„Það voru uppaldir Valsarar að skrifa undir samning fyrir ekki svo löngu. Það er kannski staðfesting á því að þær ná að halda einhverjum kjarna sem þær verða að gera því það er ekki auðvelt að komast upp úr Lengjudeildinni heldur," sagði Arnar Páll Garðarsson.

„Ég er líka með einhverja tilfinningu fyrir því að hlutirnir muni falla á ótrúlegan hátt í lokaumferðinni. Að sama skapi erum við að gleyma að ræða hitt liðið sem þær voru að keppa á móti."

„Víkingur er ekki í frábærri stöðu og ég horfi meira á ef Víkingur fellur að það verði miklu meiri flótti þaðan en úr Val. Bara út frá prófílum sem eru þar og leikmönnum sem eru þar. Það eru leikmenn þarna sem hafa spilað erlendis. Telma Ívars, Jasmín, Þórdís Hrönn, Bergdís ætlar væntanlega að komast út og Bergþóra var úti. Áslaug Dóra var líka úti. Ég sé meira fyrir mér að það verði alvöru uppstokkun hjá Víkingi ef þær falla," sagði Arnar Páll jafnframt.

Þór/KA getur líka fallið í lokaumferðinni en það verður gríðarlega áhugavert að sjá hvað gerist. Hægt er að hlusta á alla umræðuna í spilaranum hér fyrir neðan.