Heiður að spila með Gylfa - „Gaf okkur þvílíkt mikið“

Ísak var spurður hvað hefði helst verið öðruvísi í leik kvöldsins en í jafnteflinu gegn Eistlandi síðastliðinn laugardag.

„Ég held að við höfum einfaldað leikinn okkar. Orri og Andri eru tveir gríðarlega góðir framherjar. Við spiluðum aðeins lengra á þá og aftur fyrir vörn Lúxemborgar. Stefán var með góða langa bolta. Það var meiri margbreytileiki í okkar leik - reyndum ekki bara að spila á milli línanna,“ sagði Ísak.

Gylfi Þór Sigurðsson kom inn í byrjunarlið Íslands í dag og segir Ísak það heiður að spila með honum.

„Ég held að það hjálpaði mér og Hákoni líka. Það er bara geggjað að spila með honum. Hann er besti landsliðsmaður sögunnar, að fá að spila með honum er heiður. Við gerðum þetta gríðarlega vel saman. Hann gaf liðinu þvílíkt mikið í leiknum, gaf okkur jafnvægi og gat ýtt Hákoni aðeins framar.“

Ísland mætir Búlgaríu næstkomandi laugardag. „Núna þurfum við að endurheimta vel og setja einbeitinguna á næsta leik. Við þurfum að gera betur á heimavelli, heimaleikurinn var ekki nægilega góður. Við þurfum að gera betur gegn Búlgaríu,“ sagði Ísak að lokum.

Viðtalið má sjá í heild sinni í spilaranum hér að ofan.