Vináttulandsleikir: Yngsti markaskorari Bandaríkjanna frá upphafi

Bandaríkin halda áfram að fara á kostum í þessum glugga en þjálfarinn Mauricio Pochettino gefur mörgum ungum og efnilegum leikmönnum tækifæri til að láta ljós sitt skína, og leikmennirnir hafa gripið gæsina.

Eftir 4-1 sigur gegn Perú um síðustu helgi lék liðið annan vináttulandsleik, nú gegn Síle, og vann 4-2.

Mathis Albert, leikmaður Borussia Dortmund, skoraði síðasta mark leiksins í uppbótartíma og varð þar með yngsti markaskorari bandaríska karlalandsliðsins frá upphafi. 17 ára og 131 dags gamall.

Fyrr í leiknum hafði Julian Halls, 18 ára sóknarmaður New York Red Bulls, náð að skora og varð yngsti leikmaðurinn til að skora í fyrstu tveimur landsleikjum sínum fyrir Bandaríkin.

Sebastian Berhalter og Chris Richards skoruðu einnig fyrir bandaríska liðið en leikurinn fór fram í St Louis. Hinn bandarísk-íslenski Cole Campbell, leikmaður Elversberg í Þýskalandi, er í 28 manna hóp Bandaríkjanna en hefur ekki verið í leikdagshópnum í þessum tveimur leikjum sem eru búnir.

Bandaríska liðið fer nú til Phoenix í Arizona og mætir Mexíkó 3. október en Mexíkó gerði 1-1 jafntefli gegn Perú í nótt.