Klopp hringdi bjöllunni á Vetrarólympíuleikunum

Jurgen Klopp, fyrrum stjóri Liverpool, var viðstaddur keppni í boðgöngu karla í skíðaskotfimi á Vetrarólympíuleikunum á Ítalíu í dag.

Hann fékk það ábyrgðarmikla hlutverk að hringja bjöllunni fyrir lokahringinn í keppninni.

Í skíðaskotfimi er tvinnað saman skíðagöngu og skotfimi en Klopp er mjög hrifinn af íþróttinni og var aðdáandi hins goðsagnakennda Ole Einar Björndalen frá Noregi sem vann fjórtán verðlaun á Vetrarólympíuleikum.

Klopp er skíðaáhugamaður og fór um árið í skíðaferð til Íslands sem hann sagði hafa verið mikla upplifun.

Þess má svo geta að Frakkar tóku gullið í keppni dagsins sem var sýnd beint á RÚV þar sem Gunnar Birgisson lýsti af mikilli innlifun. „Sá hefur nægan frítíma," sagði Gunnar þegar hann sá hver hringdi bjöllunni.