Byrjunarlið Tyrklands og Georgíu: Kvaratskhelia í liðinu hjá Sagnol

Síðustu tveir leikir fyrstu umferðar riðlakeppni Evrópumótsins fara fram klukkan 16:00 og í kvöld. Tyrkland mætir Georgíu í nágrannaslag í dag, áður en Cristiano Ronaldo gæti leitt Portúgal út á völlinn í áhugaverðum slag gegn Tékklandi.

Liðin leika öll í F-riðli mótsins en fyrstu leikjunum er lokið í öllum öðrum riðlum.

Það er langt síðan Tyrkland var með jafn sterkt landslið og þeir eru með í dag og verður áhugavert að sjá hvernig Georgíu gengur í sinni frumraun á Evrópumótinu.

Hinn umtalaði Khvicha Kvaratskhelia verður þar í fremstu víglínu, en það eru afar fáir fótboltasérfræðingar sem búast við að Georgíumenn næli sér í meira en eitt eða tvö stig í riðlakeppninni.