Fotbolti.net
19.07.22 - 14:15
Ívan Guðjón Baldursson

Aaron Mooy og Moritz Jenz til Celtic (Staðfest)

Aaron Mooy og Moritz Jenz til Celtic (Staðfest)
Canon

Mynd: Getty Images

Celtic var rétt í þessu að kynna tvo nýja leikmenn og hefur annar þeirra spilað í ensku úrvalsdeildinni.

Sá heitir Aaron Mooy og er 31 árs landsliðsmaður Ástralíu, 32 ára í september. Mooy er miðjumaður sem á 96 úrvalsdeildarleiki að baki fyrir Huddersfield og Brighton.

Þrátt fyrir að vera ástralskur hóf Mooy atvinnumannaferilinn í Skotlandi eftir að hafa komið upp í gegnum unglingaakademíu Bolton Wanderers. Hann flutti frá Ástralíu til Englands aðeins 16 ára til að reyna fyrir sér í akademíunni.

Undanfarin tvö ár hefur Mooy verið leikmaður Shanghai Port í Kína. Hann kemur á frjálsri sölu og skrifar undir eins árs samning við Celtic.

Hinn leikmaðurinn heitir Moritz Jenz og kemur á eins árs lánssamningi frá Lorient með kaupmöguleika.

Jenz er 23 ára þýskur miðvörður sem var keyptur til Frakklands í fyrra en mistókst að hrífa þjálfarateymi Lorient. Hann fór 16 ára gamall í unglingaakademíuna hjá Fulham og hóf atvinnumannaferilinn með Lausanne-Sport í Sviss.

Mooy og Jenz eru leikmenn númer 6 og 7 sem Celtic fær til liðs við sig í sumar eftir komu Jota, Cameron Carter-Vickers, Alexandro Bernabei, Daizen Maeda og Benjamin Siegrist.

Það verður áhugavert að fylgjast með baráttu Rangers og Celtic í skoska boltanum á næstu leiktíð og gengi liðanna í Evrópukeppnum. Celtic er ríkjandi Skotlandsmeistari á meðan Rangers komst óvænt í úrslitaleik Evrópudeildarinnar og tapaði fyrir Eintracht Frankfurt í vítaspyrnukeppni.

Slapp
Fotbolti.net

© Copyright 2002-2026 Fotbolti.net / Fotbolti Ehf. All rights reserved.