Ralf Rangnick stýrir Manchester United í síðasta sinn þegar liðið heimsækir Crystal Palace á sunnudag. United er í sjötta sæti (Evrópudeildarsæti) en gæti fallið niður í það sjöunda (Sambandsdeildarsæti).

Á fundinum í dag sagðist Rangnick trúa því að það væru enn margir í liði United sem eru með gæðin til að spila fyrir Manchester United en segir nauðsynlegt að félagið fái þolinmæði til að styrkja liðið.

„Ég hef fulla trú á því að hér séu leikmenn sem eru nægilega góðir fyrir félagið. Þeir þurfa að vera með okkur næsta tímabil. Ef við fáum inn réttu mennina er ég bjartsýnn á að við náum að koma United aftur á toppinn," segir Rangnick.

„Það er kannski ekki mögulegt í einum félagaskiptaglugga en í næstu tveimur til þremur ætti það að vera hægt."

Rangnick fer í ráðgjafahlutverk þegar Erik ten Hag tekur við stjórnartaumunum. Rangnick segist hlakka til að hitta Ten Hag.