Azpilicueta: Gengur ekki að þurfa að skora fjögur til að vinna

Azpilicueta er gífurlega leikreyndur og á næstum 400 leiki að baki fyrir Chelsea. Hann viðurkennir að svona varnarleikur er ekki sæmandi fyrir félagið og segir að leikmenn verði að líta í eigin barm og laga sinn leik.

Chelsea er búið að fá níu mörk á sig eftir fimm umferðir af úrvalsdeildartímabilinu.

„Það er ljóst að ef við ætlum að berjast á öllum vígstöðvum þá verðum við að bæta varnarleikinn. Sem varnarmaður þá líður mér illa þegar við fáum svona mörg mörk á okkur. Við verðum að laga einstaklingsmistökin og verjast betur sem liðsheild," sagði Azpilicueta.

„Stundum kemst maður upp með þetta en það gengur ekki til lengdar að þurfa alltaf að skora þrjú eða fjögur mörk til að vinna leiki."

Partur af vandanum er markmannsstaðan en Kepa Arrizabalaga hefur ekki staðist væntingar eftir að hann var fenginn sem arftaki Thibaut Courtois.

„Allir lenda í erfiðleikum. Þetta hefur verið erfitt fyrir Kepa en hann mun halda áfram að sinna vinnunni sinni og gera sitt besta. Það getur verið mjög erfitt sálfræðilega að vera markvörður. Ég hef engar efasemdir um að Kepa muni gera allt í sínu valdi til að vinna sér inn traust stjórans og tryggja byrjunarliðssætið."