Fékk ekki samninginn sem hún vildi, breytti til og varð Íslandsmeistari

Elísa fékk samningstilboð frá Val eftir síðasta tímabil en sá samningur var ekki nægilega góður. „Ég hef tekið samtöl við Val, en eins og þær samningaviðræður blasa við mér eru þær einhliða og lítið við því að gera. Ég er farin að skoða aðra kosti, mér líður eins og það séu einhver ár eftir í skrokknum en ég ætla bara að vega og meta hvað kemur upp. Ég er tilbúin að skoða öll spennandi verkefni," sagði Elísa við Fótbolta.net. Ekkert var hægt að hagga við samningnum.

Fanndís Friðriksdóttir, sem fékk ekki nýjan samning hjá Val eftir síðasta tímabil, sagði þetta í Uppbótartímanum í fyrra um Elísu: „Eitthvað er búið að skera fjármagnið. Gerið þá vel við hana sem á það svo sannarlega skilið. Hún hefur skilað engri smá vinnu fyrir félagið."

Elísa ákvað að breyta til í kjölfarið á viðræðunum við Val, fór í Breiðablik og varð Íslandsmeistari enn og aftur. Á meðan féll Valur í Lengjudeildina eftir erfitt sumar.

Elísa ræddi við Morgunblaðið eftir leikinn í gær. Líklegt er að þetta sé hennar síðasta tímabil á ferlinum.

„Ég fann að það var ennþá einhver neisti hjá mér og ég var ekki alveg tilbúin að leggja skóna á hilluna. Það eru því mikil forréttindi að Breiðablik hafi komið inn í myndina í byrjun febrúar og þá var ekki aftur snúið. Frá fyrstu æfingu með Breiðabliki kviknaði neistinn enn meira og hér stöndum við í dag og þessi árangur er staðreynd," sagði Elísa í gær.