Svissneski landsliðsmaðurinn Kevin Mbabu gæti verið á förum frá Fulham aðeins hálfu ári eftir að hafa gengið í raðir félagsins frá Wolfsburg.
Fulham festi kaup á Mbabu síðasta sumar fyrir 6,3 milljónir punda en sá hefur ekki tekist að sannfæra Marco Silva, stjóra liðsins.
Mbabu hefur aðeins komið við sögu í sex deildarleikjum á þessari leiktíð og er það talið líklegt að hann yfirgefi félagið í þessum glugga.
Félög í Frakklandi og Þýskalandi eru áhugasöm um að fá hann á láni út tímabilið.
Eina vandamálið er launapakki svissneska hægri bakvarðarins en hann þénar 70 þúsund pund á viku hjá Lundúnarliðinu.
Mbabu, sem er 27 ára gamall, var eitt sinn á mála hjá Newcastle United en kom lítið við sögu vegna þrálátra meiðsla. Hann var látinn frá félaginu árið 2017 eftir að hafa spilað einungis fimm leiki í úrvalsdeildinni.
Athugasemdir