Bandaríska MLS-deildarfélagið Cincinnati FC tilkynnti í dag nýjan þjálfara en Jaap Stam tekur við liðinu.
Hollendingurinn átti magnaðan knattspyrnuferil þar sem hann lék með felögum á borð við Manchester United, Lazio, Milan og Ajax auk þess sem hann lék með hollenska landsliðinu en hann fór út í þjálfun eftir ferilinn.
Hann hefur stýrt PEC Zwolle, unglinga-og varaliði Ajax, Reading og nú síðast Feyenoord. Hann hætti með Feyenoord í október og hefur síðan þá leitað sér að nýju félagi en hann hafði verið í viðræðum við Cincinnati í nokkrar vikur.
Upphaflega átti að ráða hann fyrir rúmum tveimur mánuðum en því seinkaði vegna áhrifa kórónaveirunnar. Félagið staðfesti hins vegar ráðninguna í dag og verður hann því klár þegar MLS-deildin rúllar aftur af stað.
Stam gerði eins og hálfs árs samning og verður Said Bakkati aðstoðarþjálfari en hann hefur verið við hlið Stam frá því hann fór út í þjálfun.
Þetta er annað tímabil Cincinnati í MLS-deildinni en þrír Hollendingar eru einmitt á mála hjá félaginu. Það eru þeir Jürgen Locadia, Siem de Jong og Maikel van der Werff.
Athugasemdir