Sigurður Egill líklega ekki meira með í sumar

Sigurður Egill tognaði á nára gegn Breiðabliki í fyrrakvöld og var borinn af velli. Rannsóknir hafa nú leitt í ljós að Sigurður Egill verður frá næstu 4-6 vikurnar.

Ef allt gengur upp gæti hann þó náð lokaleikjum tímabilsins en Valur mætir Grindavík í næstsíðustu umferð 22. september og HK í lokaumferðinni 28. september.

Sigurður Egill hefur verið í stóru hlutverki í liði Vals undanfarin ár en hann hefur skorað tvö mörk í þrettán leikjum í Pepsi Max-deildinni í sumar.

Meiðsli hafa leikið Valsmenn grátt að undanförnu en þeir Lasse Petry, Ólafur Karl Finsen og Garðar Bergmann Gunnlaugsson verða ekki meira með liðinu í sumar vegna meiðsla.