Frakkland: Anna og Berglind spiluðu í tapi Le Havre

Anna Björk Kristjánsdóttir og Berglind Björg Þorvaldsdóttir voru báðar í byrjunarliði Le Havre sem þurfti að sætta sig við tap á útivelli í Montpellier.

Ashley Clark kom Montpellier yfir á 17. mínútu en staðan var 1-1 í hálfleik. Í seinni hálfleiknum reyndist heimaliðið sterkara og lokatölur 3-1 fyrir Montpellier.

Le Havre er á botni frönsku úrvalsdeildarinnar en liðið er tveimur stigum frá öruggu sæti þegar níu umferðir eru búnar.

Bæði Anna Björk og Berglind eru í íslenska landsliðshópnum sem mætir Ungverjalandi og Slóvakíu í síðustu leikjunum í undankeppni EM eftir um tvær vikur.