Aðra umferðina í röð er Emil Atlason, sóknarmaður Stjörnunnar, leikmaður umferðarinnar í boði Steypustöðvarinnar.

„Ekkert sérstaklega erfitt val í dag. Skoraði auðvitað þrennu og er orðinn markahæstur í deildinni en mér fannst hann líka vera að sinna varnarvinnu vel," skrifaði Elíza Gígja Ómarsdóttir í skýrslu um 3-1 sigur Stjörnunnar gegn KR.

Stjarnan er á flottri siglingu og Emil er kominn með tólf mörk í fjórtán leikjum spiluðum. Hann hefur misst af sex leikjum vegna meiðsla en er samt á toppnum. Með þrennunni í gær tók hann forystuna í baráttunni um gullskóinn.