Villa í viðræðum við Goretzka

Villa tókst ekki að fá Joao Palhinha á láni frá Bayern München og hefur því beint sjónum sínum að Leon Goretzka, sem yfirgaf Þýskalandsmeistarana þegar samningur hans rann út í sumar.

Villa þarf að styrkja miðsvæðið eftir að belgíski landsliðsmaðurinn Amadou Onana sleit krossband á heimsmeistaramótinu í sumar. Hann verður frá keppni næstu mánuði.

Birmingham Mail segir Villa hafa hafið viðræður við Goretzka og umboðsmenn hans. Félagið vonast til að viðræðurnar haldi áfram um helgina.

Goretzka er 31 árs gamall og lék 48 leiki með Bayern á síðustu leiktíð.

Hann var á mála hjá Bayern í átta ár og varð sjö sinnum Þýskalandsmeistari, þrisvar bikarmeistari og einu sinni Evrópumeistari.

Goretzka á einnig 73 A-landsleiki fyrir Þýskaland og lék þrjá af fjórum leikjum liðsins á HM í sumar.

Það verður nóg að gera hjá Villa áður en glugginn lokar. Félagið þarf ekki aðeins miðjumann heldur leitar einnig að vængmanni og gæti þurft að sækja framherja ef Ollie Watkins fer til Sádi-Arabíu.