Evrópudeildin í dag - Rangers mætir á Old Trafford - Orri mætir toppliðinu

Næstsíðasta umferðin í deildakeppni Evrópudeildarinnar fer fram í kvöld.

Það er gríðarlega mikið undir en bresku liðin Man Utd og Rangers eigast við á Old Trafford. United er með 12 stig í 7. sæti og Rangers í 8. sæti með 11 stig. Sigurvegarinn kemur sér því í góða stöðu um að komast beint áfram í 16 liða úrslitin.

Orri Steinn Óskarsson og félagar í Real Sociedad eru með tíu stig en liðið heimsækir topplið Lazio. Eggert Aron Guðmundsson hefur ekki verið í stóru hlutverki hjá Elfsborg, liðið fær Nice í heimsókn. Júlíus Magnússon gekk til liðs við félagið á dögunum en hann er ekki löglegur í Evrópudeildinni fyrr en í útsláttakeppninni.

Liðið er í 25. sæti sem stendur en efstu 24 liðin komast áfram. Í 24. sæti er Midtjylland sem heimsækir Ludogorets en Elías Rafn Ólafsson er á meiðslalistanum.

Ajax er með tíu stig í 11. sæti en liðið heimsækir RFS frá Lettlandi. Kristian Nökkvi Hlynsson hefur ekki verið í stóru hlutverki hjá liðinu og er líklega á förum í janúar.