„Hákon að taka við hlutverkinu sem Gylfi var í“

Hákon Arnar Haraldsson er feikilega spennandi leikmaður en hann verður tvítugur í apríl. Hann hefur farið með himinskautum með liði FC Kaupmannahafnar í Danmörku og skrifaði á dögunum undir nýjan samning við félagið til 2027.

Félög úr stærri deildum Evrópu eru með Hákon undir smásjá sinni og talað um að hann verði mögulega einn dýrasti leikmaður í sögu danska boltans.

„Það hefur gengið mjög vel í síðustu leikjum. Sjálfstraustið er í botni," sagði Hákon sjálfur við Fótbolta.net í vikunni.