Var í viðræðum við óvænt félag er Keflavík hafði samband - „Á alltaf að treysta innri tilfinningu"

„Það var ekki mjög langur aðdragandi að þessum Keflavíkurskiptum, Ásgeir Orri (Magnússon) meiðist á móti ÍBV og það var ekki vitað hversu alvarlegt það var. Keflavík var búið að hafa samband við FH um að fá að tala við mig. Það er hringt í mig og sagt að Ásgeir sé meiddur, ég veit ekki hversu alvarlega, en svo heyri ég í markmannsþjálfaranum Ómari og hann segir að þetta séu einhverjir mánuðir (sem Ásgeir verði frá). Ég fékk símtal um kvöldið (fyrir einni og hálfri viku síðan) og ég er bara mættur upp á skrifstofu Ragga framkvæmdastjóra 21:30, við eiginlega klárum þetta þar og svo skrifað undir daginn eftir. Þetta var því mjög fljótt að gerast."

Sindri hafði verið orðaður Keflavík í aðdragandum, Ásgeir Orri hafði verið orðaður við Val og Sindri talin ákjósanleg lausn fyrir Keflavík ef Ásgeir færi til Vals.

Sindri hóf sinn meistaraflokksferil hjá Keflavík og þekkir því vel til hjá félaginu. Hann þekkir líka vel til í Keflavík en hann kom þangað ungur að árum frá Bíldudal.

„Maður á alltaf að treysta innri tilfinningu, ég hafði góða tilfinningu fyrir þessu um leið og símtalið kom og ég var virkilega spenntur fyrir þessu. Um leið og við náðum saman þá var ég ekkert hikandi og kýldi á þetta."

„Það leggst hrikalega vel í mig að vera kominn aftur í Keflavíkurtreyjuna, þetta er einhvern veginn mjög eðlilegt. Ég held þetta hafi verið tíu ár með meistaraflokki, mér leið í vel þessari treyju og ég finn að ég þekki langflesta í hópnum og í kringum félagið. Þetta verður mun styttri aðlögunartími en ella."

„Mér finnst frekar augljóst að stefnan sé að fara upp, miðað við leikmannahópinn og tímabilið í fyrra. Án þess að ég hafi rætt við aðra um markmiðin þá hlýtur að vera 100% skýrt að Keflavík stefnir upp um deild."

Sindri fer vel yfir tímann hjá FH, síðasta hálfa árið og ýmislegt annað í viðtalinu sem má sjá í heild sinni í spilaranum efst. Hann var orðaður í burtu frá FH síðustu mánuði, fyrst við Grindavík og HB í Færeyjum, svo við KA og Val. Hann nefnir þó annað félag sem hann hafði verið í viðræðum við þegar hann ákvað að fara til Keflavíkur.

Hvert varstu næst því að fara?

„Reyndar ekkert af þessum félögum. Eins og þú þekkir sem fjölmiðlamaður þá eru ýmsar sögusagnir sem fara á loft; eitthvað af þessu er ekkert til í en sumt af þessu er eitthvað til í. Ég get alveg gefið út að ég ræddi við Val og ég ræddi við ÍBV í Vestmannaeyjum og náttúrulega Grindavík. Hin félögin ræddi ég ekki við."

TENGT EFNI03.03.25 - 17:41

Endar annar hvor Keflvíkingurinn á Hlíðarenda?

Var það langt áður en þú fórst í Keflavík?

„Valur var þarna á þeim tíma þegar umræðan var á kreiki, þá ræddi ég aðeins við Valsara. Það fór svo ekkert lengra. Ég ræddi við Eyjamenn á svipuðum tíma og ég ákvað að fara til Keflavíkur."

TENGT EFNI07.03.25 - 11:02

Markmannsstaðan opin hjá ÍBV vegna meiðsla Hjörvars Daða

Má segja að þú hafir fengið að velja á milli ÍBV og Keflavíkur?

„Kannski erfitt að segja til um það, en ÍBV allavega sýndi áhuga, við ræddum saman, ég talaði við Láka (Þorlák Árnason þjálfara), Eyjamenn eru með mjög spennandi verkefni í gangi í Vestmannaeyjum. En þegar Keflavík kom inn í myndina breyttist aðeins í mér þankagangurinn. Það voru samt mjög hreinskilnar viðræður við bæði stjórnarmenn ÍBV og þjálfarann, þannig það var aldrei farið á bak neinna orða, myndi ég segja."

Hjá Keflavík hittir Sindri fyrir þjálfarana Harald Frey Guðmundsson, Hólmar Örn Rúnarsson og Ómar Jóhannsson en hann lék með þeim öllum áður en þeir lögðu skóna á hilluna. Í lok viðtals er svo rifjað upp með Sindra opinskátt viðtal sem hann fór í á Fótbolta.net eftir tímabilið 2022.

Sindri verður væntanlega í eldlínunni í dag þegar Keflavík heimsækir Víking á Víkingsvöll en liðin mætast þar í æfingaleik klukkan 13:00.