Afturelding hefur samið við landsliðskonu frá Jamaíka til að hjálpa liðinu í efstu deild næsta sumar.
Landsliðskonan heitir Dennis Chyanne og leikur hún í stöðu miðvarðar.
Chyanne, sem er fædd árið 1999, á fjóra A-landsleiki fyrir Jamaíka auk yngri landsleikja. Þar áður var Chyanne í U17 ára prógrammi hjá Bandaríkjunum áður en hún ákvað að velja að spila fyrir landslið Jamaíka.
Chyanne er að koma úr háskólaboltanum í Bandaríkjunum. Þar spilaði hún lykilhlutverk með sterku liði USF (South Florida Bulls) í Division 1 þar sem hún var liðsfélagi Andreu Rán Hauksdóttur, fyrrum leikmanns Breiðabliks.
„Við erum ótrúlega spennt fyrir komu Chyanne en von er á henni til Íslands að loknu landsliðsverkefni með Jamaíka í febrúar. Við erum fullviss að hæð, styrkur og hæfileikar Chyanne muni hjálpa liðinu í baráttunni sem framundan er í efstu deild kvenna," segir í tilkynningu Aftureldingar.
Afturelding vann sér inn sæti í efstu deild síðasta sumar og verður gaman að fylgjast með liðinu í deild þeirra bestu.
Athugasemdir