England: Abraham tryggði sigur gegn sprækum nýliðum

Afar fjörugum leik var að ljúka þar sem nýliðar Norwich tóku á móti lærisveinum Frank Lampard í Chelsea.

Leikurinn fór kröftulega af stað og gerði Tammy Abraham vel að skora strax á þriðju mínútu eftir fyrirgjöf frá Cesar Azpilicueta. Todd Cantwell jafnaði skömmu síðar eftir stoðsendingu frá finnsku markavélinni Teemu Pukki.

Ungstirnið Mason Mount kom gestunum yfir á nýjan leik en Pukki jafnaði og staðan 2-2 eftir nokkuð jafnan fyrri hálfleik.

Chelsea tók stjórn á leiknum í síðari hálfleik og gerði Abraham vel að skora annað mark sitt í leiknum á 68. mínútu.

Heimamenn gerðu sig ekki sérlega hættulega og meira var ekki skorað. Lokatölur 2-3 og fyrsti sigur Lampard við stjórnvölinn hjá Chelsea staðreynd.

Norwich er með þrjú stig eftir þrjár umferðir á meðan Chelsea er með fjögur stig. Pukki er markahæstur í deildinni með fimm mörk og eina stoðsendingu.