Bale skoraði 41. landsliðsmark sitt í 1-1 jafnteflinu gegn Bandaríkjunum á dögunum en mark hans kom úr vítaspyrnu og tryggði fyrsta stigið.

Wales mætir Íran á föstudag í annarri umferð, leikur sem gæti reynst gríðarlega mikilvægur fyrir velska liðið.

Harry Wilson, liðsfélagi Bale, ræddi aðeins aðstöðuna hjá liðinu en þar sagði hann frá því að Bale hefði látið setja upp golfhermi á æfingasvæðinu.

Bale, sem er mikill áhugamaður um golf, var mikið gagnrýndur af fjölmiðlum á Spáni fyrir nokkrum árm, en þar var hann sagður hafa meiri áhuga á því að spila golf heldur en að spila fyrir Real Madrid.

Það var svo gert grín að þessum skrifum eftir að Wales tryggði sig inn á Evrópumótið en liðsfélagar hans í landsliðinu komu þá með borða sem stóð á „Wales. Golf. Madríd. Í þessari röð", en sá borði vakti ekki eins mikla lukku í Madríd og hann gerði í Wales — eins og gefur að skilja.

„Gaz lét setja upp golfhermi hérna og það hafa verið nokkrar keppnir í honum. Hann er mjög góður þegar hann nær sveiflunni en hann hefur ekki spilað mikið undanfarið því það styttist í leikinn. Bakið hans finnur aðeins fyrir því,“ sagði Wilson.