Fyrsta sinn síðan 1991 sem Milan og Juve missa af Meistaradeild

Milan tapaði sex af tíu síðustu leikjum sínum, meðal annars á heimavelli gegn Cagliari í lokaumferðinni, á meðan Juve tapaði fyrir Fiorentina og gerði jafntefli við Verona í mikilvægum leikjum í maí.

Stórveldin munu bæði leika í deildarkeppni Evrópudeildarinnar en það er afar sjaldgæf sjón að sjá hvorki Milan né Juventus fara í æðstu félagsliðakeppni Evrópu.

Það hefur ekki gerst síðan árið 1991, þegar Sampdoria vann sögulegan Ítalíumestaratitil. Milan endaði í öðru sæti deildarinnar það árið en mátti ekki taka þátt í Evrópukeppni útaf banni frá evrópska fótboltasambandinu, UEFA, eftir frægt atvik í Marseille.

Milan var að keppa við Marseille í 8-liða úrslitum gömlu Meistaradeildarinnar. Milan var ríkjandi meistari og var 2-1 undir samanlagt þegar seinni leikurinn var kominn í uppbótartíma í Frakklandi. Þegar tvær mínútur voru eftir af uppbótartímanum slokknaði á flóðljósunum svo sænski dómari leiksins neyddist til að stöðva leikinn á meðan tæknimenn leystu vandann.

Stundarfjórðungi síðar var flóðljósavandamálið leyst og ætlaði Bo Karlsson að hefja leikinn á ný þegar Adriano Galliani, þáverandi framkvæmdastjóri Milan, þrammaði inn á völlinn og dró leikmenn liðsins útaf.

Milan neitaði að klára síðustu tvær mínúturnar útaf ólögmætri truflun þar sem hann sakaði sjónvarpsmenn meðal annars um að eyðileggja grasið á vellinum á meðan flóðljósin voru slökkt.

UEFA tók ekki vel í þetta uppátæki Galliani og AC Milan og dæmdi liðið í eins árs bann frá Evrópukeppnum. Galliani var dæmdur í tveggja ára bann frá öllu UEFA-tengdu.

Á sama tíma endaði Juventus í sjöunda sæti í Serie A og missti þannig af Meistaradeildinni.

TENGT EFNI24.05.26 - 21:05

Ítalía: Como í Meistaradeildina - Cagliari skemmdi fyrir Milan