banner
   sun 25. október 2020 11:25
Ívan Guðjón Baldursson
Sterling notar rúmlega milljón til að gera ný góðgerðarsamtök
Mynd: Fótbolti.net - Hafliði Breiðfjörð
Raheem Sterling, kantmaður Manchester City og enska landsliðsins, hefur tilkynnt að hann sé að hrinda af stað nýjum góðgerðarsamtökum.

Sterling vill leggja sitt af mörkum og stefnir á að safna 10 milljónum punda fyrir góðgerðarsamtökin, hann ætlar að nota rúmlega milljón af sínum eigin pening í samtökin. Ein milljón punda samsvarar rúmlega 180 milljónum íslenskra króna.

„Ég er búinn að hjálpa mikið af góðgerðarsamtökum í gegnum tíðina og nú er komið að mér að búa ný samtök til. Ég vil gera eitthvað til að hjálpa krökkum sem voru í sömu sporum og ég," sagði Sterling við Sunday Times.

„Ef þessir unglingar vilja fara í háskóla eða ef þeim vantar fótboltadót eða aðra hluti, þá vil ég geta hjálpað þeim með þessum samtökum."

Hinn 25 ára gamli Sterling er fæddur í Jamaíka en hefur búið á Englandi frá barnsaldri. Hann hefur verið duglegur að nýta stöðu sína sem einn af þekktustu knattspyrnumönnum Englands til að berjast gegn kynþáttafordómum og hjálpa bágstöddum einstaklingum.
Athugasemdir
banner
banner
banner
banner