Spánn: Barca ekki í vandræðum með Osasuna

Barcelona tók á móti Osasuna í eina leik spænska boltans í kvöld og komst í tveggja marka forystu í fyrri hluta fyrri hálfleiks.

Ferran Torres hefur verið í miklu stuði á tímabilinu og skoraði hann fyrsta mark leiksins á elleftu mínútu. Hann hefur þá komið að 22 mörkum í öllum keppnum með Barcelona og spænska landsliðinu á tímabilinu.

Dani Olmo tvöfaldaði forystuna með marki úr vítaspyrnu tíu mínútum síðar og hélst staðan 2-0 allt þar til í seinni hluta síðari hálfleiks, þegar pólska markavélin Robert Lewandowski fékk að spreyta sig.

Lewandowski hefur verið að glíma við meiðsli og var því ekki í byrjunarliðinu, en þessi 36 ára gamli framherji kom inn af bekknum í kvöld og var búinn að innsigla sigur Börsunga með marki níu mínútum síðar.

Lokatölur 3-0 og er Barcelona með þriggja stiga forystu á toppi deildarinnar. Liðið virðist vera óstöðvandi undir stjórn Hansi Flick.

Osasuna er í neðri hlutanum, sex stigum frá fallsæti.