Spánn: Getafe setur pressu á Sevilla

Viðureign Getafe og Real Sociedad lauk rétt í þessu með sigri heimamanna. Jaime Mata var hetjan þar sem hann skoraði bæði mörk liðsins.

Fyrsta markið skoraði hann úr vítaspyrnu á 20. mínútu, sem varð til eftir slæm varnarmistök gestanna.

Mikið jafnræði var með liðunum og náðu gestirnir að jafna í síðari hálfleik. Adnan Januzaj slapp þá innfyrir vörnina eftir misheppnaða rangstöðulínu heimamanna og skoraði.

Bæði lið fengu færi til að stela sigrinum en það var Mata sem kom knettinum í netið á 83. mínútu. Jorge Molina var snöggur að taka innkast á hægri kanti og var Mata afar klókur að nýta sér það til að skora.

Boltinn skoppaði inn í teig og þurfti Mata aðeins eina snertingu til að klobba markvörð gestanna snyrtilega og stela sigrinum.

Liðin mættust í miklum Evrópuslag og er Getafe í fimmta sæti sem stendur, fimm stigum fyrir ofan Sociedad. Getafe er aðeins tveimur stigum frá Meistaradeildarsæti eftir sigurinn.