U21: Strákarnir léku listir sínar og pökkuðu Sviss saman

Komnir nær umspilinu fyrir EM

Daníel Tristan skoraði tvívegis.

Mynd: Fótbolti.net - Haukur Gunnarsson

Byrjunarlið Íslands í dag.

Mynd: Fótbolti.net - Haukur Gunnarsson

U21: Strákarnir léku listir sínar og pökkuðu Sviss saman

Mynd: Fótbolti.net - Haukur Gunnarsson

Daníel Tristan skoraði tvívegis.

Mynd: Fótbolti.net - Haukur Gunnarsson

Ísland U21 5 - 1 Sviss U21
1-0 Daníel Tristan Guðjohnsen ('11 )
2-0 Benoný Breki Andrésson ('45 )
2-1 Labinot Bajrami ('46 )
3-1 Davíð Helgi Aronsson ('62 )
4-1 Daníel Tristan Guðjohnsen ('79 )
5-1 Hilmir Rafn Mikaelsson ('86 )
Lestu um leikinn

Íslenska U21 landsliðið heldur sér í baráttunni um umspilssæti fyrir Evrópumótið en liðið vann frábæran sigur á Sviss 5-1 í Laugardalnum.

Ísland mætir Færeyjum í Þórshöfn þann 6. október og þarf að treysta á að Frakkland vinni Sviss á sama tíma.

Lestu um leikinn: Ísland U21 5 - 1 Sviss U21

Ísland byrjaði leikinn í dag af firnakrafti og var 2-0 yfir efir fyrri hálfleikinn. Daníel Tristan Guðjohnsen og Benoný Breki Andrésson skoruðu báðir af stuttu færi eftir stoðsendingar Galdurs Guðmundssonar.

Sviss minnkaði muninn strax í byrjun seinni hálfleiks en íslenska liðið komst aftur í tveggja marka foyrstu á 62. mínútu þegar varnarmaðurinn Davíð Helgi Aronsson skoraði skallamark eftir hornspyrnu.

„Okkar drengir með virkilega góða stjórn á þessum leik, halda vel í boltann og þessir strákar eru bara að leika listir, Galdur, Daníel Tristan og fleiri verið gjörsamlega stórkostlegir hérna," skrifaði Baldvin Borgarsson í textalýsingu frá leiknum.

Götóttur eins og svissneskur ostur
Á 79. mínútu skoraði Daníel Tristan sitt annað mark og fjórða mark Íslands eftir sendingu Viktors Bjarka Daðasonar. Daníel sýndi gæði sín þegar hann fór framhjá varnarmanni og kláraði vel. Varamaðurinn Hilmir Rafn Mikaelsson átti svo lokaorðið á 86. mínútu og varnarleikur gestanna svo sannarlega götóttur eins og svissneskur ostur.

5-1 lokatölur og það er því ljóst að Ísland er á leið í úrslitaleik gegn Færeyjum í komandi mánuði, um umspilssæti. Færeyingar eru sýnd veiði en ekki gefin en þeir unnu sigur hér á landi í fyrstu umferð.

Haukur Gunnarsson ljósmyndari tók meðfylgjandi myndir. Viðtöl og frekari umfjöllun Baldvins Borgarssonar, fréttamanns Fótbolta.net, koma inn á eftir.

Byrjunarlið Íslands í dag.

Mynd: Fótbolti.net - Haukur Gunnarsson