Líkleg byrjunarlið Breiðabliks og KR - Bræður í öftustu línu?

Stórleikur 1. umferðar Pepsi Max-deildarinnar er leikur Breiðabliks og KR sem fram fer á Kópavogsvelli á sunnudagskvöld klukkan 19:15. Beðið er eftir leiknum með mikilli eftirvæntingu.

KR hefur verið með gott tak á Blikaliðinu en þessi tvö lið gætu verið með í baráttunni um Íslandsmeistaratitilinn þetta sumarið.

Það eru meiðsli í varnarlínu Blika. Elfar Freyr Helgason og Davíð Örn Atlason verða ekki með í fyrsta leik og ólíklegt er að Róbert Orri Þorkelsson spili. Þá er Damir Muminovic sagður tæpur en Fótbolti.net setur hann þó í líklegt byrjunarlið.

Mögulegt er að Finnur Orri Margeirsson, sem er hugsaður sem miðjumaður í Kópavoginum, muni leysa af í vörninni í þessum leik og spila við hlið bróður síns, Viktors Arnar. Finnur kom til Breiðabliks frá KR fyrir þetta tímabil.